အလုပ်လုပ်တဲ့ နေရာမှာ အဆိုးမြင်စိတ် မလွန်ကဲပါစေနဲ့

အလုပ်လုပ်တဲ့ နေရာမှာ အဆိုးမြင်စိတ် မလွန်ကဲပါစေနဲ့

            တစ်ကယ်တော့အဆိုးမြင်စိတ်လွန်ကဲတယ် ဆိုတာဘယ်နေရာမှာမှ မကောင်းနိုင်ပါဘူး ။ တစ်ချို့ကတော့ အကျင့်ကိုပါနေတာပါ ။ ဘယ်တော့မှ တော်တော်တန်တန်နဲ့ ကောင်းပါတယ်လို့ မပြောနိုင် ကြပါဘူး။ ကောင်းပါတယ်လို့ ပြောတာတောင်မှ ကောင်းတော့ကောင်းပါရဲ့ ။ ဒါပေမဲ့ - ဆိုတာက ဆက်လိုက်ချင်သေးတာပါ ။ ဝေဖန်တာ ၊ ဆန်းစစ်တာ ၊ ခွဲခြမ်းစိတ်ဖြာတာနဲ့ အဆိုးမြင်တာ ဟာ တခြားစီပါပဲ ။ 

                ဝေဖန်ရင် ၊ ဆန်းစစ်ရင် ၊ ခွဲခြမ်းစိတ်ဖြာရင် အဆိုး သာမက အကောင်းကိုပါ မြင်နိုင်ပါတယ် ။ အဆိုးကို တွေ့မြင်ထားတယ် လို့ဆိုရင်လဲ ဘယ်လို ကောင်းအောင်ပြုပြင်သင့်သလဲဆိုတာကိုပါ တစ် ပါတည်း မြင်လိုက်နိုင်ပါတယ် ။ အဆိုးမြင်သူများကတော့ မိမိရဲ့တာဝန်ကို သူတစ်ပါးအပေါ် လွှဲချချင်တဲ့သူများ ၊ မိမိရဲ့ ချို့ယွင်းချက်ကို ဖုံးဖိလိုတဲ့သူများ ဖြစ်နေတတ်တာကို တွေ့ရပါတယ် ။ 

                 အဆိုးမြင်ဝါဒဆိုတာကတော့ တစ်ခုခုကို လုပ်တော့မယ်ဆို ရင် ဖြစ်နိုင်ပါမလားကွာလို့ ထင်တတ်ပါတယ် ။ အဆိုးမြင် ဝါဒမဟုတ်တဲ့ သူတွေကြတော့ ဖြစ်နိုင်တဲ့အလုပ်ဟုတ်ရဲ့လား ၊ မဟုတ်ဘူးလား နဲ့ တွေးတောမှု ၊ ဆန်းစစ်မှုများ လုပ်လေ့ရှိပါတယ် ။ အလုပ်လုပ်နေ ရင်းလဲ ဒီခြေလှမ်းဟာ မှန်တဲ့ခြေလှမ်းဟုတ်မဟုတ် တွေးတောတတ် ပါတယ်။ ဒါပေမဲ့ အမှားတစ်ခုခုတွေ့ရင် အဆိုးမြင်ဝါဒနဲ့ အကောင်းမြင် ဝါဒတို့ ရင်ဆိုင်ပုံ မတူကြပါဘူး ။ ကိုယ်နဲ့မဆိုင်ရင် ၊ ကိုယ်မကြိုက်တဲ့သူ လုပ်တဲ့ကိစ္စဖြစ်ရင် တချို့က အပျက်ကိုပဲ ကြိုတွေးတတ်ကြပါတယ် ။ အဲဒီလို လူမျိုးတွေက အဆိုးမြင်ဝါဒ များဖြစ်ပါတယ် ။ တစ်ကယ့်ကို အပျက်နဲ့ရင်ဆိုင်ရရင်လဲ “ ဖြစ်မှာပေါ့ ၊ အစကတည်းက ဒီလို့ဖြစ်မယ်ဆိုတာ သိသားပဲ ” လို့ စတဲ့ စတဲ့စကားတင်းမျိုး ဆိုတတ်ကြ ပြန်ပါတယ် ။ မိမိနဲ့ မိမိလိုလားသူတို့ လုပ်တဲ့အလုပ်များကိုလဲ အဆိုးမြင် ဝါဒ တစ်ချို့က ဖြစ်မှဖြစ်ပါမလားလို့ သံသယနဲ့ မဝံ့မရဲလုပ်တတ်ကြပါတယ် ။ တစ်ချို့ကတော့ အတက်အကျမြန် တတ်တဲ့စိတ်အထာကြောင့် ကိုယ်လုပ်ရင် ဖြစ်မယ်လို့ တစ်ထစ်ကျ ယုံတတ်ကြပါတယ် ။ သူ့ အဆိုးမြင်မှုက သူများအပေါ်မှာသာ အဆိုးမြင်တတ်တာကိုး ။ အဲဒီလူမျိုးဟာ အလုပ်မှာ အမှားတွေ ၊ ဆုံးရှုံးမှုတွေ့နဲ့တွေ့ရင် မဆည်နိုင်အောင်ဖြစ်တတ်ပါတယ် ။ ငါ့ကိုမှ ဒါမျိုးဖြစ်သလားဆိုတဲ့ အတွေးမျိုးနဲ့ ဆိုးရွားစွာ ခံစားရုံမကဘဲ ဒီလိုဆုံးရှုံးမှုအတွက် ဘယ်သူ့ ကို အပြစ်တင်ရင်ကောင်းမလဲဆိုတဲ့အတွေးကို ( တစ်ခါတစ်လေ သူ့ ဘာသာသူမသိဘဲ ) တွေးတတ်ပါ တယ် ။ ဒီအရှုံးကို ကာမိအောင် ဘာလုပ်မလဲဆိုတာကို အရင်မတွေးတတ်ပါဘူး ။ 

                 အကောင်းမြင်ဝါဒများကတော့ အလုပ်လုပ်ရင် သေသေချာ ချာ ဆန်းစစ်ပေမယ့် မမျှော်လင့်ဘဲ မှားတတ်တဲ့အမှားတွေ ရှိတတ် တယ်ဆိုတာကို တွေးထားလေ့ရှိပါတယ် ။ အဲဒါကြောင့် သူတစ်ပါးမှာ ဆုံးရှုံးမှုတွေနဲ့ ရင်ဆိုင်ရရင် ဝမ်းသာစိတ်ပေါ်မယ့်အစား ဒီလို အမှား မျိုး ငါမမှားအောင် လေ့လာထားမှ ဆိုတဲ့စိတ်နဲ့လေ့လာတတ်ပါတယ် ။ သူက ဝမ်းသာစိတ် ၊ ဝမ်းနည်းစိတ်ဆိုတဲ့ ခံစားမှုထက် လေ့လာလို တဲ့ ၊ စူးစမ်းလိုတဲ့ ၊ ဆန်းစစ်လို့တဲ့စိတ် ဦးစီးနေတဲ့အတွက် သူတစ်ပါး ကို မလိုမုန်းထားစိတ်နဲ့ ဝမ်းသာလေ့လဲ မရှိတတ်ပါဘူး ။ အရေးကြီး တာက ဘယ်သူ့ဘဝကိုပဲ လေ့လာလေ့လာ သင်ခန်းစာကောင်းရဖို့ ပဲ ဖြစ်ပါတယ် ။ 

                 အကောင်းမြင်ဝါဒဟာ သူကိုယ်တိုင် အလုပ်လုပ်ရာမှာ အဆုံး အရှုံးနဲ့ ရင်ဆိုင်ရင် စိတ်မဆင်းရဲဘူးလားလို့ မေးစရာရှိပါတယ် ။ လူ ပဲလေ- စိတ်ဆင်းရဲမှာပဲ ။ ဒါပေမဲ့ သူ့ဘဝအတိုင်း သူဟာ အဆိုးမှာ သူ့စိတ်ကို မကိန်းစေဘဲ ချက်ချင်းလိုလို အမှားဟာ ဘာလဲ ၊ မှန်အောင် ဘယ်လိုပြင်ရမလဲ ဆိုတာကိုပဲစိတ်ဝင်စားမှာပါ။ တွေဝေနေ မှာမဟုတ်ပါဘူး ။

                 ကျွန်မတွေ့ဖူးသမျှ အဆိုးမြင်ဝါဒများဟာ အောင်မြင်သင့် သလောက် အောင်မြင်နေကြသည့် တိုင်အောင် စိတ်မချမ်းသာကြပါဘူး ။ သူတစ်ပါးအပါ်အပြစ်မြင်နေရတာကိုက သူ့အဖို့ လေးလံတဲ့စိတ်အ ထာကို ဖြစ်စေတတ်ပါတယ် ။ အဲဒါကြောင့် ကိုယ့်အောင်မြင်မှုကို ကိုယ်အပြည့်အ၀ မခံစားနိုင်ကြပါဘူး ။ လောကမှာ လူဖြစ်လာတယ်လို့ဆိုကတည်းက အကောင်းနဲ့ အဆိုးဟာ ဒွန်တွဲပြီး ပါလာတတ်တာပါပဲ ။ ဘယ်နေရာ ၊ ဘယ်အချိန်မှာမဆို ငါသာလျှင်ကောင်းစားဖို့ဆိုတဲ့ တစ်ကိုယ်ကောင်းစိတ်နဲ့ တွေးတာများလာရင် အဲဒီလူဟာ အဆိုးမြင်ဝါဒဖြစ်ဖို့ များလာပြီလို့ ဆိုရမှာပါပဲ ။ ဘယ်လောက်ပဲ ငါကောင်းစားဖို့ တစ်ယောက်တည်းကြိုးစားသည်ဖြစ်စေ ၊ ဘယ်သူမဆို ရင်ဆိုင်ရတတ်တဲ့ လောကဓံကျတော့ အရှုံးပေးရမှာပါပဲ ။ မိတ်မရှိ ၊ ဆွေမရှိ ၊ တစ်ဦးတည်း ၊ တစ်ယောက်တည်း လောကဓံကို ရင်ဆိုင်ရတဲ့သူများအနေနဲ့ ဒုက္ခက ပိုကြီးမှာ ပါပဲ ။ လူ့ဘဝကို ရလာပြီလို့ဆိုတဲ့အခါမှာ အဆုံးစွန်ဆိုးတာလည်း မရှိပါဘူး ။ အဆုံးစွန်ကောင်းတာလဲ မရှိပါဘူး ။ အင်မတန် ပြည့်စုံပါတယ် ၊ ကံကောင်းပါတယ်လို့ ဆိုတဲ့ သူများတောင်မှ လောကဓံဆိုးလေးပါးနဲ့ ကြုံတဲ့အခါမှာ အတော်ခံရဆိုး ပါတယ် ။ အပြစ်တင်ရမယ်ဆိုရင် ၊ အဆိုးမြင်ရမယ်ဆိုရင် လူ့ဘဝဟာ ဘာမှမက်မောစရာမရှိပါကလားဆိုပြီး စိတ်ဓာတ်ကျသွားနိုင်ပါတယ် ။ လူတောင် သေသွားနိုင်ပါတယ် ။ အဲဒီအချိန်မှာ သူတစ်ပါးကိုပဲဖြစ်ဖြစ် ၊ လူမှုအဖွဲ့အစည်းကို ပဲဖြစ်ဖြစ် နိုင်ငံကိုပဲဖြစ်ဖြစ် အပြစ်တင်ကြည့်ပါလား ။ ပိုပြီးတာ စိတ် ဆင်းရဲသွားတော့မှာပေါ့ ။ အလုပ်လုပ်တဲ့နေရာမှာလဲ ဟန်ချက်တွေ ပျက်သွားနိုင်ပါတယ် ။ မူလကတည်းက အဆိုးမြင်တတ်တဲ့သူဟာ အလုပ်ခွင်မှာရော၊ ဘဝမှာပါ တွေ့မှာသေချာတဲ့ အခက်အခဲများနဲ့ ရင်ဆိုင်ရတဲ့အခါ မှာ ကောင်းကွက်ကို ရှာမတွေ့တာနဲ့ဘဲ ထွက်ပေါက်မရှိတဲ့ ခံစားမှုမျိုး နဲ့ စိတ်ဒုက္ခများစွာရောက်ရပါလိမ့်မယ် ။ ကိုယ်ကအသာစီးနေရာ မှာ နေနေသေးရင်တော့ သိပ်မဆိုးလှပါဘူး ၊ ကျပြီဆိုရင် မိမိကိုယ်ကိုမိမိ ဆွဲတင်နိုင်ဖို့ ကြိုးစ ရှာမတွေ့ဘဲ ဖြစ်သွားမှာ စိုးရပါတယ် ။ 

                 ကျွန်မနေနဲ့တော့ အဆိုးရော ၊ အကောင်းရော ရောပြွမ်းနေ တဲ့ လောကကြီးမှာ ကောင်းအောင် လုပ်မယ်ဆိုရင်လဲ ကိုယ့်ကိုယ်ကိုပဲ အားကိုးရမှာပါပဲ ။ ( ခံရဖူးတာ ထပ်ကြိမ်များတဲ့သူ အနေနဲ့ ပြောတာပါ ) ။ အဲဒီတော့ အရာရာကို သတိထားတန်ထားပြီး ရွှင်ပျတဲ့စိတ်အထာနဲ့ ရင်ဆိုင်လိုက်ရင် အလုပ်လုပ်တဲ့နေရာမှာ လွယ်ကူ ပေါက်မြောက်လာပါလိမ့်မယ်လို့ အကြံပေးလိုပါတယ် ။ 

 ကိုးကား -ဒေါက်တာမတင်ဝင်း ( ပညာရေးတက္ကသိုလ် ) 

 “ သူများ အပြစ်ကို များများတွေးလေ ကိုယ့်ဘ၀ မတိုးတက်လေပဲ ။ ” “ သူများအကြောင်း တွေးရင်လည်း ကောင်းတဲ့အရည်အချင်းတွေ ၊ စိတ်ထားတွေ ၊ လုပ်ရည်ကိုင်ရည်တွေ ၊ အတုယူစရာ ကောင်းတာတွေကို တွေးသင့်တယ် ။ မနာလိုတဲ့စိတ်နဲ့ သူများအကြောင်း များများတွေး သူများအပြစ်ကိုပဲ စိတ်ဝင်စားနေရင် ကိုယ်လုပ်သင့်တာကိုကိုယ် မလုပ်ဖြစ်တော့ဘူး ။ ” 

 " You don't have to explain yourself " ' Think good of the other, and you are actually  thinking good about yourself " 

 “ သူများအကြောင်းကို အကောင်းတွေးပါ ၊ သူများအကြောင်း အကောင်းတွေးလို့ရှိရင် ကိုယ့်အကြောင်းကိုပါ အကောင်းတွေးပြီးသား ဖြစ်သွားပါတယ် ။